Të gjithë e dimë tashmë si bëhen punët në Shqipëri: me ngulmim, me ngritje zëri, vrenjtje vetullash, miq pa hesap dhe shpërndarje parash sa majtas dhe djathtas. Por ama në thelb qëndron vullneti i hekurt për të arritur atë qëllim (shpesh qëllim ultra personal), vullnet i pakompromis, përballë të cilit çdo pengesë shkërrmoqet.
Ky lloj vullneti është ai që i shkon për shtat më shumë politikës, qeverisë dhe mënyrës së jetesës sot në Shqipëri. Nuk mendon njeri për gjënë e përbashkët, por të gjithë për interesin personal. Toleranca, altruizmi dhe respekti për tjetrin janë virtyte bezdisëse që duhen flakur tutje nëse duhet krijuar pasuri...
Në këtë kakofoni interesash personale ka dhe disa njerëz me ideale. Janë të pajisur me tolerancë, të armatosur me argumenta, të regjur ne debate publike. Por vuajnë nga doza e tepërt e virtytit të virtyteve, që në kushtet e sotme është arma vetëflijuese më e fortë: respekti për mendimin e tjetrit.
Që të biem dakord: jemi në demokraci dhe të gjithë duhet të kuptojmë kufijtë e lirisë dhe të drejtat që gëzojnë të tjerët. Por nuk duhet abuzuar me një zell të kopjuar në ndonjë kryeqytet evropian me respektin ndaj mendimit të tjetrit. Një ilustrim i vogël, në mënyrë që mendimi të jetë i qartë. Dje u promovua libri me disa artikuj të zgjedhur që kanë si temë kryesore Piramidën. Në të figurojnë emrat më në zë të shoqërisë civile shqiptare që ngrihen kundër fobisë berishiane të radhës kundër Piramidës. Ky libër duhet parë si një etapë në vazhdën e shumë aksioneve në mbrojtje të Piramidës. Pra, jemi në kushtet e një partizanizmi të vërtetë, ata janë ngritur për të mbrojtur Piramidën! Në këto kushte, futja e artikullit të Blendi Fevziut në këtë kolazh, ndërkohë që ai është shprehur për prishjen e Piramidës si dhe vendosja e këtij artikulli në krye të librit mbante shijen e hidhur të pranimit të disfatës nëpërmjet respektimit të parimit të mbrojtjes së fjalës ndryshe. Por, libri a është partizan?! A është i rreshtuar? Përse një tolerancë e tillë kur situata nuk e diktonte? Nuk mjaftoi gjëma vetëflijuese e Zhakut ditën e mitingut në mbrojtje të Piramidës, por duhet, për të mbyllur ciklin, dhe një tregues mëshire, ndrojtjeje dhe vënie në pozita mbrojtëse duke pranuar shkrime në atë përmbledhje që normalisht duhet t’i kishte fshikulluar.
Përballë vullneteve të forta personale të mbrojtura nga Qeveria, shoqëria civile që mbron të mirën publike duhet të tregojë vendosmëri në parime, përndryshe do të jemi gjithmonë në vend numëro duke u habitur sesi vidhen tenderat e zgjedhjet dhe si harrohen ngjarjet e dhimbshme që kanë ritmuar jetën tonë këto kohët e fundit.
Stavri
| Share |
Civilizimi i një populli kuptohet nga mënyra si trajton kafshët. Mu kujtua kjo shprehje e Mahatma Gandit ndërsa shikoja një video që qarkullon kohët e fundit në ueb dhe që dokumenton fushatën e ndërmarrë nga Bashkia e Durrësit për shfarosjen e qenve endacakë. Ekzekutimi i kafshëve në mes të rrugës nuk është gjë tjetër veç barbarizëm. Në prag të sezonit turistik qëllimi, një qytet i pranueshëm për pushuesit, nuk mund të justifikojë mjetin, eliminimi fizik i qenve.
